શ્રેણી:છપ્પા

• એક મૂરખને એવી ટેવ

  એક મૂરખને એવી ટેવ, પથ્થર એટલા પૂજે દેવ,
  પાણી દેખી કરે સ્નાન, તુલસી દેખી તોડે પાન.
  એ અખા બહુ ઉતપાત, ઘણા પરમેશ્વર એ ક્યાંની વાત ?

• આંધળો સસરો ને સરંગટ વહુ

 આંધળો સસરો ને સરંગટ વહુ, એમ કથા સાંભળવા ચાલ્યું સહુ.
 કહ્યું કાંઈ ને સમજ્યું કશું, આંખનું કાજળ ગાલે ઘસ્યું.
 ઊંડો કૂવો ને ફાટી બોક, શીખ્યું-સાંભળ્યું સર્વે ફોક.

• જો જો રે મોટાના બોલ

 જો જો રે મોટાના બોલ, ઊજડ ખેડે બાજ્યું ઢોલ.
 અંધ અંધ અંધારે મળ્યા, જ્યમ તલમાં કોદરા ભળ્યા;
 ન થાયે ઘેંસ કે ન થાય ઘાણી, કહે અખો એ વાતો અમે જાણી.

• દેહાભિમાન હૂતો પાશેર

 દેહાભિમાન હૂતો પાશેર, તે વિદ્યા ભણતાં વધ્યો શેર;
 ચર્ચાવાદમાં તોલે થયો, ગુરુ થયો ત્યાં મણમાં ગયો.
 અખા એમ હલકાથી ભારે હોય, આત્મજ્ઞાન મૂળગું ખોય.

• સસાશિંગનું વહાણ જ કર્યું

 સસાશિંગનું વહાણ જ કર્યું, મૃગતૃષ્ણામાં જઈને તર્યું;
 વંધ્યાસુત બે વા’ણે ચઢ્યા, ખપુષ્પ વસાણાં ભર્યાં.
 જેવી શેખસલીની ચાલી કથા, અખા હમણાં ને આગળ એવા હતા.

• તિલક કરતાં ત્રેપન થયાં

 તિલક કરતાં ત્રેપન થયાં, જપમાલાનાં નાકાં ગયાં,
 તીરથ ફરી ફરી થાકયા ચરણ તોય ન પોહોતો હરિને શરણ.
 કથા સુણી સુણી ફૂટ્યા કાન, અખા તોય ન આવ્યું બ્રહ્મજ્ઞાન.