હું રંગરાતી ને છું મદમાતી
| હું રંગરાતી ને છું મદમાતી નરસિંહ મહેતા |
હું રંગરાતી ને છું મદમાતી, શામળિયા સંગ હીછું રે,
કોડ ભર્યો અતિ કુંવર નંદનો, આલિંગન દેઈ સીંચું રે. હું રંગરાતી..
હીંડોળે હિંચે મારો વહાલો, હિચંતાં કેલિ કીજે રે;
ઘુમરડી ઘુમાવે ગોકુલપતિ, લહાવો લડસડ લીજે રે. હું રંગરાતી..
અલ જઈએ અલવેશર સાથે, વિલસત જમના માનુ રે;
લેહેરી લેતાં અંગ સમાગમ, અધરપાન કીધું છાનું રે. હું રંગરાતી..
હિંડોળે હુલરાવું તમને, હેતે કરીને ગાઉ રે;
નરસૈયાના સ્વામી સંગે રમતાં, કાનજીને કંઠે વિટાઉ રે. હું રંગરાતી..